神奇又悲情的阿梅

梅艷芳逝世十周年，大群義氣仔女藝人歌手，為佢搞紀念演唱會，張學友最擔大旗，出錢又出力。至於曾志偉，更專程趕回港助陣。

沒有無緣無故的懷念，梅艷芳無論在演藝圈及民主運動圈，皆有令人可敬的一頁留下。

梅艷芳身世，非常坎坷，尤其愛情一瓣，更屬我見猶憐，可用崎嶇跌宕形容。

台上的阿梅，充滿自信，魅力四射；台下的她，則自卑自怨，嚴重缺乏安全感。可能，正因如此，在大紅大紫日子，晚晚要呼朋引類、夜夜笙歌，以麻醉自己。接觸梅艷芳次數不多，但已足夠見證台上台下兩個極端形態阿梅。

某次大型演出，佢又例遲，嚇到幕後製作者標尿咁滯，因入場觀眾，十之八九為睇佢。但，過晒鐘，開埋場都未出現，仍未見「梅蹤」。

正在count down時間死綫之際，但見數位近身由抬帶扶，將佢搬入後台化粧間，當時，阿梅對眼少少反白，不停嘔吐。

化粧及梳頭師傅，可能見怪不怪，一於將軟綿綿的阿梅當公仔咁舞。

講都唔信，美術指導為佢裝身時，佢個款仍似半昏迷，一笪爛泥咁款。

遠遠聽到後台經理大叫：「下個到阿梅！」然後，場務員入來大喝：「快快快！」

那邊廂，音樂已起。心諗：「今鋪死得，阿梅點唱呀？」

說時遲那時快，好一個梅艷芳，一聽見自己得獎歌曲的前奏，立時似足充咗電，三步作兩步踏上台前，以高水準演繹每首歌。非常神奇呀！